وقتاش نحط رحالي.
دير عقلك يالسايگ لا تبع هبالك.
تبات داوي ضاحك ،تصبح مكتف بلجامك.
الدنيا دوارة و سوايع بدالة
،بحال الساگية ماها يجري لامع گدامك .
رد بالك راه لعدو اللي عكر الما ،
يقدر يكون عشيرك أوحتى من جيرانك.
يا السامع كون تقدر.
خلي لسانك شهد،لعسل منو يتگطر .
كلمة زينة منو فايحة عطر.
ولو يكون عنيد قاصح حجر.
يولي صابر ،قادر يعبر.
عاند لا تحسد ،خلي الگافلة غاديا بلا ما تعثر.
فتح لها طريق وتجنب
يولي لعدو لك صديق يتقرب.
طيب الخاطر بكلمة لا تخليه يتكسر.
راه الخاطر رهيف عظمو حالف ما يتجبر.
ليام اللي مشات ما تولي.
وصمايم عمرها ترجع ليالي.
صهدها حامي لهيبو زاند يلالي
دلوني يا ناس وقتاش نحط رحالي.
طاح ظلام بانت نجوم لامعة بضو هلالي.
سرجت عود مانع،حطيتو فراس الگافلة.
يحرسلي زادي وجمالي
بقلم الأستاذة الشاعرة والزجالة لالة خديجة مبروك
