عييت نخبع ،كاتمة دموعي
گدام الناس نتصنع.
القلب من همومو يتوجع ،
نادم على يام فاتت ما ترجع
آش هاد زمان ؟
شي بارك وشي صگع.
تعلقت فحبال گالو متينة ،
ما ترشى ما تتگطع.
شديت فيها ومن قاع الحفرة بغيت نعافر ونطلع.
تقت بكلام الناس اللي گالو
لحبال متينة ما يحسكوها ماس ما يقطعوها نياب سبع
حسيت بالضربة بالغة ،هرست عظامي.
وزادت الضلع.
ضحكت وبكيت ملي حسيت بمناجل ماضية تگطع.
حسكت حبالي من جدر ،حصدات،
ما خلات حب مارحمت زرع
لحبال الراشية إلى ما ضرت
ما تنفع.
آش هاد زمان شي بارك وشي صگع.
شي عايش حياتو ما هاز هم ،ديما ضاحك يتمتع.
وأنا على ظهري حمل ثقيل،
مرة نصبر ومرة نطيح ونتكربع.
عييت نكابر عييت نعافر.
گدام الناس ضاحكة ،
والله اللي عالم بلخاطر.
هذا حال الدنيا ،
شي طالع،شي نازل.
شي عايش فوق السلك.
وشي حسكاتو لمناجل.
هادي هي الدنيا ،
عمرها تعتادل…
فيها العالم ينور لك الطريق،
وفيها الجاهل.
واحنا راضيين بالمكتاب ،
والله وحدو هو العادل.
بقلمي الأستاذة الشاعرة والزجالة لالة خديجة مبروك
