الزمان بحال السفينة مرة راسي ومرة سباح.
ما يزيد الليل بوقاتو ماينقص وجعاتو صباح.
ما تشدو حبال متينة،ما تعوجو رياح.
فيق ،حل عينيك وقول يا فتاح.
إلى وقفت على رجليك ولبال هاني ولقلب بلا جراح
گول هذا من فضل الله ،
عايش سالم مرتاح.
عش يامك بقلب مسلم فرحان.
بلا ما تخمم ،بلا ما تبات الليل سهران.
كيفما كان الحال ،عطشان ولا جيعان.
تبسم لاتولي شفايا لعديان.
واخ يبلغ فيك الضر،عافر وصبر.
هز راسك عيط علحرف يحضر.
وأنت غادي بكل ثيقة تهضر
حكم لخطوة سير بلا ما تلفت بلا ما تعثر.
ويلا گلست حط الصينية مصقولة تباهى بها وتعنگر.
كب الكاس برزتو والبراد مطنطن ومشحر.
يا ولد الدار لكبيرة ،ياولد الخير.
فينما مشيتي هز راسك بلا ما تحسر.
أنت ولد لخيمة لكبيرة
ديما تعطي بلا ما تمن بلا ما تكبر.
الجود من أصلك طالع
بحال لعسل من شهدو يتگطر.
انس الهم راه يجلب لك غير الخنقة والغم.
دير النيا وبكلام الله غيرتحزم.
لا يخدعك الظاهر وتگول
لكتاب من عنوانو باين يتفهم.
خلي لكتاب وراقو واضحة گدامك .
كمل مشوارك ،وبحرفك قهر عديانك
فينما مشيتي أو حطيتي رحالك
تحزم به يزيدك قوة ،يمتن كتافك.
راه الحرف بحر عميق.
ما يگدو على ماجو عديانك.
الحرف حرفك وأنت مولاه
بلا ما تهجرو كون دواه.
بلا ما تفكر، گدامك ديما تلقاه
دير من حرفك سفينة ،
يرسي بك فكل مدينة.
يبعد عليك كل هم وغبينة.
ويخليك تشوف الدنيا ديما زينة.
بقلمي الأستاذة والشاعرة الزجالة لالة خديجة مبروك
