المغرب تحت المجهر….الشاعرة لالة خديجة مبروك
آش هاد زمان اللي كثر فيه القيل والقال.
النيا قلت،ولكلمة ما بقى عندها ميزان.
واش هذا زمان أو رمال صحاري ولا كثبان ،
تهزو رياح و ترميه مابقات عندو همة ولا شان.
الحكمة فيه غابت،
والسر ولا يتباع بالتمان.
واش حنا خوت ولا عديان.
الگافلة دايزة فصحاري
تشق الطرگان .
ولكلاب الضالة مافيها أمان.
واخا تبات تنبح ،ماتعض ماتجرح.
مول النيا كيربح.
ولغدار سمو ما يعمر قدح.
آش هاد زمان مافيه ما يتفهم.
الراس عامر بلهم ،
وبنادم مطارقو دقها ما يرحم.
تكسر جناحي ،عييت ما نخمم.
لمن نشكي هاد الهم.
اللي عمر شواري ما بغا يتلم.
نظل به لالي ،
أنا نهرم وهو ما يسالي.
واش هذا حال الناس
ولا غير حالي.
دلوني ياناس فين نحط رحالي.
واش أنا هبيل ولا بوهالي.
ما لقيت خليل ،
لمن نطلق عنان لساني.
نبات مكتف مهموم وساري.
وهمي يتكاثر بحال نجوم ليالي.
واش هذا حال كل الناس
ولا غير حالي.
دلوني يا ناس فين نحط رحالي.
نرسي الگافلة نورد جمالي.
ندگ لوتاد نعلي سواري.
أنا مهموم وهذا حالي.
ماني هبيل ماني بوهالي.
كلمتي تهرس لحجر
وتزعزع السواري.
ما نقض عهد
ما نبوح بسراري.
هذا حالي،والخالق اللي خلقني.
برضاه يشملني ومن فضلو يكرمني.
بقلمي الأستاذة الشاعرة والزجالة لالة خديجة مبروك
